Hindstan xalıq sanı buyınça berençe bulaçaqmı?

Hindstan dön’yada xalıq sanı buyınça berençe urınğa çığarğa mataşa.

Berläşkän Millätlär oyışmasınıñ “8 milliard tormış, çiksez mömkinleklär: xoquqlar häm saylaw mäs’äläse” dip isemlängän xisabı basıldı. Anda Hindstandağı xalıq sanınıñ yıl urtasında yaqınça 3 million ayırma belän Qıtaynı uzıp kitäçäge belderelä. İldä yäşäwçelär sanı 1 milliard 428 millionğa citäçäk dip farazlana.

Xisapta citkerelgänçä, 8 däwlät - Kongo demokratik cömhüriyäte, Misır, Êfiopiya, Hindstan, Nigeriya, Paqıstan, Filippinnar häm Tanzaniya -2050nçe yılğa qadär küzallanuçı xalıq sanı artunıñ yartısın täşkil itäçäk.

Berläşkän Millätlär oyışmasınıñ xalıq sanın cıya häm bastıra başlağan 1950nçe yıldan birle Hindstannıñ täwge tapqır Qıtaynı uzıp kitäçäge belderelde.

Qıtayda xalıq sanı 2022nçe yılda 800 meñ keşegä kimep 1961nçe yıldan birle berençe tapqır artqa kitte.  

Milli statistika byurosınıñ mäğ’lümatlarına qarağanda, Qıtaynıñ töp territoriyäsendä 2021nçe yılda 1 milliard 412 million 600 meñ keşe yäşägän, 2022dä bu san 1 milliard 411 million 800 meñ bularaq bilgelände.

BMO iq’tisadi häm sośial’ êşlär idaräse çığarğan “Dön’yada 2022nçe yılğı xalıq sanı perspektivaları” xisabında Qıtay xalqınıñ 2023nçe yıldan başlap kimü prośessına keräçäge, Hindstan xalqınıñ isä artuın däwam itep iñ küp keşele däwlät bulaçağı küzallanğan ide. Anda Qıtay xalqınıñ 2050nçe yılda 1 milliard 317 millionğa, ğasır axırında isä 766 millionğa qadär töşäçäge farazlanuı äytelä.