Afrika liderları aradaşçılıq öçen Sudanğa baraçaq

Sudan kön tärtibe belän cıyılğan IGAD äğ’za illär Keniya, Kön’yaq Sudan häm Cibuti liderların armiya belän operativ yärdäm köçläre arasındağı bäreleşlärne tuqtatu tırışuları öçen mömkin bulğan iñ qısqa waqıtta başqala Xartumğa cibärü qararın qabul itte.

Wäkillekneñ qayçan yulğa çığaçağı bilgele tügel. Başqalada bäreleşlär isä däwam itä.

Afrika Berlege komissiyası başlığı Musa Faki Möxämmäd tä Sudanğa baraçağın beldergän ide.

Sudannıñ başqala Xartumda häm törle şähärlärendä 15nçe aprel’ irtäsendä Sudan ğaskäre belän qorallı operativ yärdäm köçläre arasında qorallı bäreleşlär başlanğan ide.

Armiya belän operativ yärdäm köçläre arasında "Operativ yärdäm köçläreneñ tulısınça ğaskärgä quşıluın” küzdä totqan xärbi qurqınıçsızlıq reforması mäs’läsendä soñğı berniçä ay buyı yäşängän kileşmäwçänlek qaynar bäreleşlärgä äylängän ide.

İldäge bäreleşlärdä tınıç xalıqtan distälägän keşeneñ ülüe, ğaskärilär belän bergä yözlärçä keşeneñ yaralanuı belderelgän ide.