1 millionğa yaqın bala citärlek däräcädä tuqlana almıy

Säxildä 1 millionğa yaqın bala citärlek däräcädä tuqlana almıy.

Berläşkän Millätlär Oyışmasınıñ Balalarğa yärdäm itü fondı YUNİSEF belderüendä äytelgänçä, Mali, Niger häm Burkina - Fasoda yaqınça 970 meñ bala azıq-tölek bäyäläre kütärelü, bäreleşlär häm klimat üzgäreşe yoğıntısı arqasında naçar tuqlana.

Belderüdä xökümätlärne balalar tuqlanuın östenlekle mäs’älälär arasına kertergä häm açlı-tuqlı yäşäwgä qarşı köräş öçen investiśiyälärne arttırırğa öndädelär.

Belderüdä Nigerda yaqınça 430 meñ balanıñ, Malida 367 meñ balanıñ qurqınıç astında buluı äytelä.

Säxil illäre Burkina - Faso, Çad, Gambiya, Mavritaniya, Mali, Niger, Nigeriya, Senegal häm Kamerunnıñ tön’yağında naçar tuqlanu arqasında uzğan yıl xastaxänägä salınğan balalar sanı 1 million 900 meñgä citkän. Bu isä 2021 nçe yıl belän çağıştırğanda 31%qa kübräk.

BMOnıñ Balalarğa yärdäm itü fondı YUNİSEF mart ayında Säxildä 10 million balanıñ gumanitar yärdämgä moxtac buluın açıqladı.