AQŞta utlı qorallar can ala

Amerika Quşma Ştatlarında utlı qorallar bu yılnıñ berençe kvartalı tulmıyça 10 meñnän artıq can aldı.

İldäge qorallı qırıslıq waqıyğaların arxivlağan Gun Violance Archive beldergänçä yaña yıldan birle qorallı qırıslıq waqıyğaları arqasında ğomere özelüçelär sanı 10 meñ 2 buldı.

Gun Violance Archivenıñ internet säxifäsendä urın alğan mäğlümatqa kürä yıl 2023tä utlı qoral belän üz-üzenä 5742 keşe qul salğan, cinayät’tä häm yalğış qoral qullanu näticäsendä 4260 keşe ülgän, 7519 keşe yaralanğan.

Şul uq waqıyğalarda 0-11 yäş’lärdäge 59 häm 12-17 yäş’lärdäge 345 bala utlı qoral qullanu näticäsendä yaqtı dön’yadan kitkän.

AQŞ däwlät başlığı Djo Bayden Tennessi ştatınıñ Neşvil şähärendäge mäktäp höcümennän soñ Amerikan Kongressın cawaplı itep kürsätte.

“Kongresska êşkä kereşüe öçen yalwarudan başqa berni dä êşli almıym. Monıñ belän bäyle Kongress êş başqarırğa tiyeş,” – dide Bayden.

Djo Bayden Amerikan xalqında höcüm qoralları buluınıñ säyer buluın uylawın, üzenä tapşırılğan başqarma wäqaläten bar yaqlap qorallı qırıslıq belän köräş öçen monnan alda qullanuın açıqladı.