Gonduras Tayvan' belän diplomatik mönäsäbätlärne özde

Qıtay belän suverenlıq öçen konfliktta bulğan Tayvan’nı tanuçı azsanlı däwlätlärneñ berse bulğan Gonduras älege töbäk belän diplomatik mönäsäbätlären özüen belderde.

Gonduras tışqı êşlär ministrlığınnan yasalğan belderüdä bolay diyelä: “Gonduras cömhüriyäte xökümäte dön’yada ber genä Qıtay buluın häm Qıtay xalıq cömhüriyäteneñ Qıtaynı tulısınça wäkillek itüçe berdänber qanunlı xökümät buluın tanıy”. Anda Tayvan’nıñ Qıtay cirläreneñ ayırılmas öleşe buluı assızıqlana häm Gonduras xökümäteneñ Tayvan’ belän diplomatik mönäsäbätlärne kisüe, bernindi räsmi êlemtä urnaştırmasqa ışandıruı belderelä.

Pekin idaräse “Ber Qıtay” prinśibın alğa sörep Tayvan’nıñ üz territoriyäse öleşe buluın yaqlıy. Qıtay üzen tanuçı däwlätlärneñ Tayvan’ belän diplomatik mönäsäbätlärne kisü şartı quya.