Rusiyäne terrorçılıqqa yärdäm itüçe illär isemlegenä kertäçäklärme

Amerika Quşma Ştatları däwlät särqatibe Êntoni Blinken Rusiyäne terrorçılıqqa yärdäm itüçe illär isemlegenä kertüneñ telänmägän näticälärgä kiterä aluın belderde. Ul Senatta ber komitetnıñ däwlät departamentınıñ 2024nçe yılğı byudjetı mäs’äläsen qarawçı utırışında sorawlarğa cawap birde.

Ber senator annan Rusiyäneñ terrorçılıqnı yaqlawçı illär isemlegenä kertelüe öçen êşçänleklärneñ qaysı tirädä buluın soradı. Blinken Rusiyägä qarata bik küp törle sankśiyälär kertülären xäterlätte.

“Rusiyäneñ suğış cinayät’läre häm zolımnarına qarata küp törle sankśiyälärebez bar. Terrorçılıqqa yärdäm itüçe illär isemlegenä alunıñ üze belän telänmägän näticälär kiterä aluın uylıym,”-dide ul.

Däwlät särqatibe Mäskäwgä qarşı barlıq mömkin bulğan çaralarnı kürülären söyläde. “Terrorçılıqqa äyrdäm itüçe illär isemlegenä kertü mäs’äläsen söyläşergä kiräk. Çönki ber ük näticä birüçe başqa yullar da bar,”-dide Blinken.