Putinnı qulğa alu qararı çıqtı

Xalıqara cinayät’ mäxkämäse, Ukrainada êşlängän cinayät’lärne tikşerü qısalarında, Rusiyä däwlät başlığı Vladimir Putin häm Rusiyäneñ balalar xoquqları komissarı Mariya Alekseyevna L’vova-Belovanı qulğa alu qararı çığaruın citkerde. Alarnı suğış waqıtında ukrainalı balalarnı Rusiyägä urlawda ğayeplilär.

Mäxkämädän yasalğan belderüdä äytelgänçä, ğayeplänüçelärneñ ikese dä ukrainalı balalarnı Rusiyägä legal’ bulmağan räweştä alıp kitüdä qatnaşa. Qulğa alu qararın qorbannarnı yaqlaw niyätennän başta yäşeren totarğa uylıylar. Tik xäzerge waqıtta da cinayät’lärneñ däwam itüen küz uñında totıp häm yañaları êşlänüenä kirtä bulu maqsatınnan qararnı cämäğat’çelekkä belderälär.  

Rusiyä däwlät başlığı süzçese Dmitriy Peskov bu qarar belän bäyle belderüendä bolay di: “Rusiyä qayber däwlätlär şikelle bu mäxkämäneñ xökem itü wäqaläten tanımıy. Şul säbäple, bu tördäge teläsä-qaysı qarar xoquqıy yaqtan Rusiyä Federaśiyäsendä ğamälgä yaraqsız”.

Rusiyä tışqı êşlär ministrı Mariya Zaxarova da sośial’ media akkauntında belderü yasadı. “Xalıqara cinayät’ mäxkämäse qararları xoquqıy yaqtan ilebez öçen bernindi mäğ’nägä iyä tügel. Rusiyä Xalıqara cinayät’ mäxkämäseneñ Rim nigezlämäsenä kermäde häm, şuña kürä, bernindi yöklämäläre yuq” dp yazdı ul.  

Mäxkämäneñ qararına êläkkän Rusiyä balalar xoquqları komissarı Mariya L’vova-Belova da üz fikerlären belderde. “Xalıqara cämäğat’çelekneñ ilebezneñ balalarına yärdäm itü öçen başqarıluçı êşçänleklärne, alarnı suğış bulğan cirlärdä qaldırmawıbıznı, annan çığaruıbıznı, alar öçen yaxşı şartlar buldıruıbıznı, alarnı yaratuçı, ähämiyät birüçe keşelär belän äyländerep aluıbıznı kürä belüe bik äybät” - dide ul.

Ukraina xökümäte räise Denis Şmıgal’ isä sośial’ media akkauntında yasağan belderüendä Xalıqara cinayät’ mäxkämäseneñ bu qararın ğadellek yulında ähämiyätle adım bularaq bäyäläde. “Bu häm başqa agressiyä cinayät’läreneñ cawaplısı - Putın. Terrorçı däwlätneñ başlığı hiçşiksez mäxkämä qarşına çığarğa häm Ukrainada êşlägän barlıq cinayät’läre öçen cawap birergä tiyeş”-dide ul.  

Ukraina Tışqı êşlär ministrı Dmitro Kuleba da mäxkämä qararına qanäğat’ qaluların belderde