Patşa Çarl'znıñ markaları çıqtı

Angliyädä 2022nçe yılnıñ sentyabrendä täxetkä utırğan patşa Çarl’z Öçençe sürätlängän berençe markalar çıqtı. BBCneñ xäbärenä qarağanda, baqça çäçäkläre räsemnärennän toruçı seriyädä monarxnıñ siluêtı urın ala.  

Patşabikä Êlizabet ülgännän soñ Angliyädä äle uzğan ayğa qadär anıñ räseme häm siluêtları qullanıldı.

Böyekbritan patşalığı poçta berläşmäseneñ tışqı mönäsäbätlär häm säyäsät bülege mödire Dêvid Gold baqça çäçäkläre räsemnäre töşerelgän marka seriyäsendä patşa Çarl’znıñ siluêtı da buluınıñ anıñ baqçaçılıq häm çäçäklär belän qızıqsınuın çağıldıruın belderde.

Älege markalar kiläse atnada kürsätügä quyılaçaq, tik iske markalar betkänçe äyläneşkä kermäyäçäk. Patşa räsemnäre töşkän markalarnıñ xatlarğa kiläse aydan soñ yabıştırıla başlayaçağı farazlana.   

Patşabikä Êlizabet sürätlängän berençe markalar 1952nçe yılda täxetkä utıruınnan soñ 16 yıl ütkäç qullanıla başlıy.