İzraildä krizis

İzraildä xökümät räise Binyamin Netan’yaxu xökümäteneñ Yuğarı mäxkämä wäqalätlären qısqartuçı tözätmäläre krizisqa kiterde. İl külämendä distälärçä meñ keşe qatnaşındağı rizasızlıq çaraları 10 atnadan artıq däwam itä.

İlbaşı İsaak Gerśog krizis säbäple grajdannar suğışı çığa aluı turında kisätte. “Sonğı berniçä atna İsrailneñ iq’tisadına, iminlegenä, bötenlegenä zıyan salıp bezne tarqattı,”-dide ul.

Gerśog krizisnı ciñü öçen “Xalıq proyektı” dip ataluçı täq’dimen belderde. Ul älege dokumentnıñ parlamentnı, xökümätne häm xoquq sistemasın nığıtaçağın söyläde. “Däwlät cimerelergä tiyeş tügel,”-dide ilbaşı.

Gerśog täq’dim itkän xalıq proyektınıñ detal’läre belän İzrail mediası urtaqlaştı. Anda mäxkämä räislären bilgeläw komitetında küpçelek urınnıñ xökümät koaliśiyäsenä birelmäwen, anıñ urınına 11 äğ’zadan barı 5eseneñ koaliśiyägä birelüe küzallana.

Proyektta, şulay uq, Yuğarı mäxkämäneñ İzraildä yarımkonstituśion sanaluçı Töp qanunnarğa kontrol’ ütkärä almawı da äytelä.

İzrail xökümäte räise Netan’yaxu isä Gerśognıñ xalıq proyektı täq’dimenä tiskäre cawap birde. Ul älege dokumentnıñ xäzerge wäzğıyät’ne tağın da naçaraytaçağın alğa sörä.