”Azärbaycan Germaniya häm Awrupa Berlege öçen könnän - kön möhim partnyer bulıp tora”
Bu xaqta Germaniya kanślerı Olaf Şol’ś Azärbaycan ilbaşı İlham Äliyıv belän Berlinda üzara küreşep söyläşkännän soñ ütkärelgän urtaq matbuğat oçraşuında citkerde
9)Germaniya kanślerı Olaf Şol’ś belän Azärbaycan ilbaşı İlham Äliyıv Berlinda üzara küreşep söyläşkännän soñ urtaq matbuğat oçraşuı ütkärdelär.
Şol’ś oçraşuda ike il arasında xezmättäşlekne tiränäytü turında söyläşülären, Azärbaycan häm Awrupa Berlegeneñ Könçığış partnyerlığı qısalarında tağın da tığızrak êşlärgä teläwen äytte.
”Azärbaycan Germaniya häm Awrupa Berlege öçen könnän - kön möhim partnyer bulıp tora”,- dide Olaf Şol’ś.
Ul Azärbaycannıñ Germaniya häm Awrupanıñ ênergiya belän täêmin iteleşen törleländerü potenśialına iyä buluın belderde, şulay uq oçraşuda Rusiya – Ukraina suğışınıñ Azärbaycanğa häm Kön’yaq Qavqazğa täêsire turında söyläşülären äytte.
Şol’ś Rusiyäneñ Ukrainağa höcüme xalıqara xoquq bozu dip iskärtep, Rusiya däwlät başlığı Vladimir Putinnıñ planınnan baş tartırğa häm ğaskärlären Ukrainadan çığarırğa tiyeşlegen tağın ber tapqır qabatladı.
Germaniyäneñ Ärmänstan - Azärbaycan çigendäge totrıqsızlıq turında borçıluın assızıqlap, bu xäl ozaqqa suzıla almıy häm kiyerenkelek artu qurqınıçı tudıra dide Şol’ś. Konfliktnı tınıç yul belän çişüneñ Ärmänstan häm Azärbaycannıñ cir bötenlege prinśibına nigezlänergä tiyeşlegen citkerde.
Azärbaycan ilbaşı İlham Äliyıv Ärmänstannıñ bu mömkinlekne quldan ıçqındırmasqa tiyeşlegen äytte.
Äliyıv Awrupa belän ênergiya xezmättäşlege turında kileşü imzalawların belderep, ”Bez Awrupada gaz êksportın arttırabız. Bıyıl gaz êksportın 8 milliard kub metrdan 12 milliard kub metrğa qadär arttırırğa uylıybız. Bu bezneñ barlıq êksportıbıznıñ yartısın täşkil itäçäk”dide.
İlham Äliyıv Berlinda 30 ğa yaqın alman êşmäkär belän oçraştı, alarnı investiśiyälär xaqında söyläşü öçen Azärbaycanğa çaqırdı.
