Ukraina: "Tön'yaq Ağımdağı sabotaj belän bäyläneşebez yuq"
Rusiyä belän Germaniyäne Baltıyq diñgeze aşa ber-bersenä bäyläwçe Tön’yaq Ağım tabiğıy gazütkärgeçenä uzğan yıl yasalğan sabotajnı Ukraina yaqlı törkemnär başqaruı turında xäbärlär çıqtı
Ukraina saqlanu ministrı Oleksiy Reznikov Tön’yaq Ağım tabiğıy gazütkärgeçendä 2022nçe yılnıñ sentyabrendä oyıştırılğan sabotajlarnıñ üz ile belän bernindi bäyläneşe bulmawın belderde. Ul Şveśiyäneñ başqalası Stokgol’mda Awrupa Berlege däwlätläre saqlanu ministrlarınıñ räsmi bulmağan cıyılışında çığış yasadı. Reznikov AQŞ häm Germaniyä matbuğatında çıqqan Tön’yaq Ağım gazütkärgeçenä qarata sabotajlarnı Ukraina yaqlı törkemnär êşläwe turındağı xäbärlär belän bäyle fikerlären citkerde. “Minem öçen bu bezneñ belän bernindi bäyläneşe bulmağan säyer xikäyä. Räsmi tikşerüneñ barlıq detal’lärne açıqlayaçağın uylıym. Bu bezneñ küzläw oyışmasın yuğarı bäyäläw şikelle, tik bezneñ ğamällärebez tügel,”-dide ministr.
“New York Times” gazetı Rusiyä gazın Awrupağa iltüçe Tön’yaq Ağım ütkärgeçlärenä uzğan yılnıñ sentyabr’ ayında yasalğan sabotajlar öçen Ukraina yaqlı törkem cawaplı buluı turında küzläw mäğ’lümatları qulğa töşerelüen yazğan ide.
Germaniyäneñ däwlät kanalı ARD häm “Zeit” gazetınıñ xäbärendä dä şular söylände.
Rusiyä belän Germaniyäne Baltıyq diñgeze aşa ber-bersenä bäyläwçe Tön’yaq Ağım tabiğıy gazütkärgeçenä zur zıyan salınğan ide.
