AQŞta qızamıq kizüe kisätüe
Qızamıq belän awıruçı beräw dini çarada qatnaşıp başqa bik küp keşegä virus yoqtırğan bulırğa mömkin
Amerika Quşma Ştatlarında oyıştırılğan dini çarada yaqınça 20 meñ keşeneñ qızamıq kizüe riskına duçar buluı belderelde.
AQŞ awırularnı kontrol’dä totu häm profilaktika üzägennän citkerülärençä, uzğan ayda Kentukki ştatınıñ Vilmor şähärendäge Êsberi universitetında xristian törkem cıyın uzdıra. Anda qatnaşqan beräwgä soñınnan qızamıq diagnozı quyıla.
AQŞ awırularnı kontrol’dä totu häm profilaktika üzäge çarada buluçılar öçen kisätü bastırdı. “Ägär 17nçe-18nçe fevral’dä Êsberi universitetı cıyılışında qatnaşsağız häm qızamıq vakśinağız bulmasa yäisä tulı tügel ikän, 21 köngä karantinğa kerergä häm qızamıqnı başqalarğa yoqtırmas öçen simptomnarnı küzätep barırğa kiräk” diyelä anda.
Belderüdä, şulay uq, vakśina qadatmağan keşelärne qızamıq, qolaq artı bize şeşü infekśiyäse häm qızılça vakśinası yasatırğa çaqıralar.
Wäqalätlelär kisätkänçä, qızamıq virusı sulış alu yulları aşa çiktän tış yoğışlı häm, bik nıq alğa kitkän preparatlarğa qaramastan, bigräk tä, balalarda ülem säbäbe bula ala.
