Kovid-19nıñ laboratoriyädän çığuı döresme?
2020nçe -2022nçe yıllarda böten dön’yağa taralğan häm yözlärçä meñ keşeneñ ülemenä kitergn virusnıñ laboratoriyädän çığu ixtimalı turında qabat süz quzğaldı
AQŞ milli qurqınıçsızlıq kinäşçese Djeyk Sallivan koronavirus pandemiyäsen kiterep çığarğan virusnıñ laboratoriyädän taraluı turındağı sorawğa tögäl cawap bulmawın söyläde.
CNN kanalına interv’yu birgändä annan ênergetika ministrlığınıñ “Wall Street Journal” gazetında çıqqan xisabı xaqında sorıylar. Anda “Kovid-19 kizüeneñ laboratoriyädän sarqığan bulu ixtimalı bik zur” digän näticä yasala.
Sallivan küzläw oyışmaları arasında bu mäs’älädä törleçä qaraşlar barlığın, tik nıqlı fikergä kilü öçen citärlek mäğ’lümat yuqlığın belderde. Ul ilbaşı Djo Baydennıñ küzläw oyışmaların bu sorawnıñ nigezenä töşü öçen küp tapqırlar yünältüen äytte.
“Tağın da kübräk mäğ’lümat alsaq, monı Kongress häm Amerika xalqı belän urtaqlaşaçaqbız. Läkin xäzergä küzläwçelärdän bu sorawğa tögäl cawap çıqmadı,”-dide Sallivan.
“Wall Street Journal” gazetı ênergetika ministrlığınıñ küptän tügel Aq Yortqa häm ähämiyätle Kongress äğ’zalarına yäşeren küzläw mäğ’lümatları citkerüe turında yazdı. Älege xisapqa qarağanda, Kovid-19 virusınıñ Qıtaydağı laboratoriyädän yalğışlıq belän çığu mömkinlege bik zuq.
Virus kiterep çığarğan kizü 2020nçe -2022nçe yıllarda böten dön’yağa taraldı häm yözlärçä meñ keşeneñ ülemenä kiterde.
