"Qıtaynıñ Rusiyägä qoral birüen älegä kürmädek, tik bu variantnıñ bula alaçağın beläbez"

Amerika Quşma Ştatları saqlanu ministrlığı süzçese, general Patrik Rayder monnan alda Ukraina-Rusiyä suğışında tarafsızlığın iğ’lan itkän Qıtaynıñ bu torışınnan waz kiçep, Rusiyäne yaqlıy başlawına borçıluların belderde. Ul köndälek matbuğat cıyılışında sorawlarğa cawap birde.

“Qıtaynıñ Rusiyägä qoral birüen älegä kürmädek, tik bu variantnıñ bula alaçağın da beläbez,”-dide Rayder.  Ul Rusiyägä qoral birgän oçraqta Qıtaynıñ monıñ öçen cawap biräçägen, Pekinnı bu xaqta kisätülären äytte.

“Qıtaynıñ Rusiyägä yärdäme suğış qırına niçek täêsir itäçäk?” sorawına general Qıtaynıñ tağın da alğa kitkän texnologiyäle qorallarğa iyä buluın citkerde.

“Şunı küräçäkbez: qulında bik aldınğı qorallar bulğan, monnan alda tarafsızlığın iğ’lan itkän Qıtaynıñ xäzer ber yaqnı yaqlawı häm torıp: “Monnan soñ Ukrainanı yuq itärgä cıyınuçı lager’ğa keräbez” diyüe bu bäreleşne ozaytaçaq,”-dip söyläde Rayder.

Süzçe AQŞnıñ, suğış däwam itkänçä, Ukrainağa teräk bulaçağın äytte.

Amerika Quşma Ştatları iñ soñğı açıqlanğan yärdäm paketı belän bergä älegä qadär Ukraina armiyäsenä 32 milliard dollar xärbi yärdäm täêmin itte.

AQŞ xalıqara üseş agentlığı da Ukraina-Rusiyä suğışınıñ berençe yılında Ukrainağa ışandırğan 9,9 milliard dollarlıq yärdäm programmasın aktivlaştıruın citkerde. Ul belem birüçelär häm mediśina xezmätkärlärenä bireläçäk.