G7 finans ministrları Ukrainağa yärdämen täqrarladı

Amerika Quşma Ştatları, Germaniya, Angliya, Kanada, Franśiya, İtaliya häm Yaponiyadan torğan G7 illäreneñ finans ministrları häm üzäk bank başlıqları Hindstannıñ Bengaluru şähärendä oyıştırğan cıyılıştan soñ urtaq belderü yasadı.

Belderüneñ başında Türkiyädä häm Süriyädä barlıqqa kilgän cimergeç cirteträwlär yul açqan ülemnär häm cimerülär arqasında tirän borçılu citkerelüe, cirteträwlärdän täêsirlängän keşelärgä yärdämneñ däwam iteläçäge äytelde.

Rusiyä-Ukraina suğışınıñ yıllığında suğış häm Rusiyäneñ azıq-tölekne häm ênergiyanı qoralğa äyländerüe säbäp bulğan global’ iq’tisadi awırlıqlarnı tikşerü öçen xalıqara xezmättäşlekneñ köçäytelüendä täwäkkällek buluına basım yasalğan belderüdä Ukrainanıñ aşığıç qısqa möddätle finanslaw ixtıyaclarınıñ qanäğätländerelüe mäs’äläsendäge qatğıylıqnıñ däwam itelüe citkerelde.

Belderüdä: "Ukraina xökümäteneñ ixtıyacları qısalarında 2023nçe yıl öçen byudjet häm iq’tisadi yärdäm yöklämäbezne 39 milliard dollarğa citkerdek,” – dip äytelde.

G7 finans ministrları häm üzäk bank başlıqlarınıñ belderüendä Ukrainağa mart ayı axırına qadär "ışanıçlı, raslanğan, tulısınça finanslanğan häm yaraşlı räweştä şartlandırılğan" programma täq’dim itüe öçen dä IMFgä çaqıru yasaldı.

Ukrainanıñ kritik asqormasınıñ tözekländerelüenä bulışlıq itü häm öleş kertü öçen urtaq tırışularnıñ däwam iteläçäge iskärtelep uzılğan belderüdä Rusiyäneñ suğışına cawap bularaq qullanılğan koordinaśiyalı iq’tisadi çaralarğa bäylelek dä raslandı.

Belderüdä: "Sankśiyälärebezne ütäw häm çikläwlärdän taypılu yäki taypılu omtılışların totqarlaw öçen bergä häm urtaqlarıbız belän yaqın räweştä êşlärgä däwam itäçäkbez. Bu cähättän başqa illärne dä Rusiyägä qarşı sankśiyälärebezgä quşılırğa çaqırabız,” – dip äytelde.