AQŞ Süriyäneñ sankśiyälären ciñeläytte
Cir teträwdän zıyan kürgän Süriyä xalqına kilüçe yärdämnärne kirtälämäw öçen AQŞ 180 köngä sankśiyälärdän azat itü qararı çığardı
Amerika Quşma Ştatları 6nçı fevral’dä Süriyägä dä täêsir itkän Kaxramanmaraş cir teträwlärennän soñ kilüçe yärdämnärgä röxsät birü maqsatınnan ilneñ 180 köngä sankśiyälärdän azat iteläçägen citkerde.
AQŞ finans ministrlığınnan yasalğan belderüdä Çit il aktivların kontrol’dä totu ofisınıñ Süriyä öçen cir teträw yärdämnäre belän bäyle barlıq êşçänleklärgä röxsät birüçe ğomumi liśenziyä çığaruı äytelä. Älege dokument Süriyä sankśiyälären köyläw qararları belän tıyılğan yärdämnär öçen 180 köngä yul aça.
Belderüdä AQŞ sankśiyä programmalarınıñ qanunlı gumanitar yärdämnärgä qarşı bulmawı assızıqlana. “Sankśiyälärneñ ciñeläytelüe Äsäd rejimınıñ ozaq waqıt däwam itüçe struktur problemaların häm räximsez taktikaların üzgärtmäyäçäk, tik bu hälakättän soñ kiräkle bulğan ğomer qotqaruçı yärdämne kirtälämäwen täêmin itä ala” diyelä anda.
Ministrlıq Süriyädäge wäzğıyät’ne küzätep baraçaqların belderä.
AQŞ finans ministrı urınbasarı Uolli Adeyemo cimergeç zilzilälärdän soñ faciğale yuğaltular öçen Türkiyä belän Süriyä xalqınıñ qayğısın urtaqlaştı. “Xalıqara berlektäşlär häm gumanitar yärdäm urtaqları zarar kürüçelärgä yärdäm itü öçen berläşkändä, AQŞnıñ Süriyägä karata sankśiyäläreneñ keşe ğomerlären qotqaru tırışlıqlarına komaçawlamayaçağın açıqtan-açıq belderergä telim,”-dide ul.
