Salqınnar can ala

Äfğanstanda soñğı ber ayda küzätelüçe tiskäre hawa şartları arqasında ülüçelär sanı 176ğa citte.

Soñğı yıllarnıñ iñ awır qışı kürelgän Äfğanstanda hawa däräcäse qayber töbäklärdä tönlä -30ğa, başqala Kabulda isä -10ğa qadär töşä.

Taliban waqıtlıça xökümäteneñ Tabiğıy afätlärdän cawaplı däwlät ministrlığı süzçese Şafiullah Rahimi ildä xäzergä qadär 176 keşeneñ tuñıp ülüen belderde.

Rahimi xalıqara cämäğat’çelekne qırıs qış aylarınnan täêsirlängän äfğan xalqına yärdäm kürsätergä çaqırdı.

Awır qış ayları iqtisadqa da yoğıntı yasıy. Taliban citäkçelegeneñ İgençelek, suğaru häm awıl xucalığı ministrlığı süzçese Mubahiddin Mustain monnan alda açıqlaw yasap, 20 vilayät’tä 129 meñe bärän häm käcä bulğan barlığı 260 meñ terlekneñ yuqqa çığuın beldergän ide.

Salqınnarda artqan taläpneñ qanäğat’länderelmäwe arqasında ildä sägät’lär buyı ut bulmıy. Kabul üzägenä êlektr könenä barı tik 8-10 sägät’ kenä birelä.

Äfğanstanda iqtisadi krizis arqasında qış aylarında utın häm kümer ala almawçı äz keremle küp keşe bar.

Berläşkän Millätlär Oyışması mäğlümatlarına kürä ildäge xalıq sanınıñ 3tän 2 öleşen täşkil itüçe 28 million keşe aşığıç yärdämgä moxtac.