Köymädä 8 möhacirneñ mäyete

Alar açlıqtan häm suıqtan ülgän

1941807
Köymädä 8 möhacirneñ mäyete

İtaliyäneñ Lampedusa utrawına barıp citkän ber köymädä 8 möhacirneñ mäyete tabıldı.

Rainews24 kanalı xäbärenä qarağanda, Urta diñgezdä Mal’ta êzläw-qotqaru töbäge êçendä qalğan urında İtaliyäneñ yar buyı iminlek berämlekläre migrantlarnı utırtqan ber köymä öçen qotqaru operaśiyäse oyıştırdı. Anıñ waqıtında 46 keşene qotqaralar, 8eneñ isä üle gäwdäse genä tabıla.

ANSAnıñ xäbärendä köymädäge mäyetlärneñ 5se ir-at, 3se xatın-qıznıqı buluı äytelä. Aralarında ber awırlı xatın-qız da bar. Alarnıñ açlıq häm suıqtan ülüläre farazlana.

Annan berniçä säğat’ alda isä şul uq Lampedusa utrawına 75 keşene utırtqan 2 qaçaq köymäse kilgän bula.

Lampedusa mêrı Filippo Mannino xökümät räise Djordjiya Meloniğa çaqıru yasadı. “Xökümät bezne bu zur faciğada idarä itü mäs’äläsendä yalğız qaldırmasın. Bezgä yärdäm itegez, bu räweşle bulmıy,”-dide ul.



Bäyläneşle xäbärlär