Finlyandiyä Qor'änne yandıruğa yul quymayaçaq

Finlyandiyä poliśiyäse cämäğat’çelekkä açıq mäydannarda Qor’än-i Kärim şikelle izge kitaplarnıñ yandırıluına röxsät birelmäyäçägen belderde. İl matbuğatınıñ cirle STT mäğ’lümat agentlığına tayanuçı xäbärenä qarağanda, Finlyandiyä milli poliśiyä idaräse izge kitaplarnıñ yandırıluın “cäzağa tartıla torğan cinayät’” bularaq bilgeli. Alay gına da tügel, izge kitaplarğa qarata başqa mısqıllawlar da oxşaş räweştä küreläçäk.  

Belderüdä Finlyandiyä poliśiyä wäqalätlese Vesa Pixajokineñ fikerlärenä dä urın birelä. “Qor’än-i Kärimneñ yandırıluı planlaştırılğan bulsa, poliśiyä çaranı oyıştırğan keşegä röxsät birelmäyäçägen aldan belderer ide. Bigräk tä, älege ğamäl ber demonstraśiyä waqıtında bulsa, poliśiyä aña tıqşınaçaq”- di ul.

Xäbärdä Finlyandiyä xoquqınıñ, başqa Skandinaviyä illärennän ayırmalı bularaq, “dini tınıçlıq”nı saqlawı häm anı bozğan öçen cäzağa tarta aluı turında mäğ’lümat bar.  

Şveśiyäneñ başqalası Stokgol’mda 21nçe ğıynvarda Daniyäneñ çiktän tış uñçı partiyäse liderı Rasmus Paludan Türkiyäneñ Stokgol’m ilçelege qarşında Qor’än-i Kärim kitabın yandırdı. Anı bu ğamäle waqıtında ber törkem poliśiyä xezmätkärläre saqlıy häm yanına berkemne dä yaqınlaştırmıy.

Paludan 27nçe ğıynvarda da Daniyädä mäçet qarşında häm Türkiyäneñ Kopengagen ilçelege yanında  Qor’än kitabın yandırğan ide.