Zelenskiy aşlıq kileşüen cäyelderergä teli

Ukraina däwlät başlığı Volodimir Zelenskiy aşlıq kileşüen Mikolayev portlarına qadär cäyelderü waqıtı citüen belderde. Ul räsmi säfär belän Odessa şähärenä kilgän Daniyä xökümäte räise Mette Frederiksen belän urtaq matbuğat cıyılışında çığış yasadı.

“Korablarnıñ xäräkäten çikläwçe barlıq kirtälärne beterü waqıtı citte,”-dide Ukraina liderı häm bu mäs’älädä Daniyädän yaqlawğa ömetlänülären äytte.

Zelenskiy Rusiyä belän Ukraina arasında 24nçe fevral’dän birle däwam itüçe suğış belän bäyle wäzğıyät’kä dä tuqtaldı, bigräk tä Donbass töbägendäge awır bäreleşlärneñ däwam itüen xäterlätte. Ul rus köçlärenä qarşı näticäle köräşü öçen Ukraina armiyäseneñ tanklarğa ixtiyacı buluın belderde häm berlektäşlärne älege texnikanı cibärü prośessın tizlätergä çaqırdı.  

Daniyä xökümäte räise Frederiksen isä Zelenskiy belän Mikolayev häm Odessa töbäklären qarawın äytte. Ul ruslarnıñ höcümnäre näticäsendä, bigräk tä, Mikolayev töbägendäge asqormanıñ nıq zıyan kürüen citkerde häm Ukrainağa yärdäm itäçäklären belderde.

Ukraina asqorma ministrı Oleksandr Kubrakov noyabr’dä berlektäşlärgä aşlıq kileşüen Mikolayev portına qadär cäyelderergä kiñäş itüen äytkän ide.  Tik BMOnıñ gumanitar êşlär öçen cawaplı ğomum särqatip urınbasarı Martin Griffits aşlıq kileşüeneñ yaqın kiläçäktä başqa portlarnı da üz êçenä aluınıñ bik mömkin kürenmäwen citkerde.