İstanbulda sammit uzaçaq
Anda Rusiya - Ukraina suğışınıñ geosäyäsi häm iq’tisadi näticäläre turında söyläşäçäklär
Awrupa Berlegeneñ Türkiyä delegaśiyäse başlığı häm tulı wäqalätle ilçe Nikolaus Meyer - Landrut Rusiya - Ukraina suğışı başlanuğa 1 yıl uzu nisbätennän 22 nçe fevral’dä İstanbulda zur sammit uzaçağın belderde.
Ul bu xaqta matbuğat äğ’zalarına yasağan belderüendä citkerde.
Meyer-Landrut äytüençä, sammitqa Ukraina xakimiyätennän dä wäqalätle çaqırılaçaq, şulay uq Türkiyädän dä wäkil bulaçaq.
Ul sammitta suğışnıñ geosäyäsi häm iq’tisadi näticäläre turında söyläşäçäklären äytte.
“Bu sammit şulay uq Ukrainağa bulışu, yaqlaw kürsätü ısulı da. Uzğan yıl 24 nçe fevral’dä Rusiya agressiyäseneñ başlanuı Awrupa tarixında möhim mizgel buldı. Awrupa tarixı – bezneñ urtaq geografiyäbez. Keşelär yış qına 9-11 sentyabr’neñ Amerika qurqınıçsızlıq tarixında möhim üzgäreş mizgele buluın äytälär. 2022 nçe yılnıñ 24 nçe fevrale dä Awrupa qurqınıçsızlığı öçen şundıy uq möhim. Bezneñ qıytğabızda suğış, ayawsız zur suğış bara” dide ul.
Awrupa Berlegeneñ Türkiyä delegaśiyäse başlığı Nikolaus Meyer-Landrut suğış näticäläreneñ Ukraina belän genä çiklänmäwen, suğışnıñ härkemgä qağıluın assızıqladı.
