Kiyevtağı hälakätneñ säbäplären tikşerälär

Ukrainanıñ başqalası Kiyev tiräsendä bulğan boralaq hälakätendä ilneñ êçke êşlär ministrı Denis Monastırskiy häm urınbasarın da kertep 18 keşeneñ ğomere özelde.

Kiyev töbäge gubernatorı Oleksiy Kuleba beldergänçä, yaralılarnıñ sanı 29ğa citkän, alarnıñ 15e bala.

Ukraina poliśiyä idaräse mödire İgor Klimenko isä yazmaça belderüendä hälakättä Monastırskiy häm urınbasarı Yevgeniy Yeninnıñ ğomere özelüen citkerde. Ul yaralanğan 29 keşeneñ xastaxanägä salınuın äytte.

Ukraina matbuğatındağı xäbärlärgä qarağanda, boralaq ber balalar baqçası yänäşäsenä kilep töşkän häm anda yanğın çıqqan.

Ukraina êçke êşlär ministrlığı kiñäşçese Anton Geraçenko sośial’ media akkauntı Feysbuk aşa boralaq hälakäte turında belderü yasadı. “Faciğaneñ säbäplären tikşerälär. Sabotajmı, cihazlarnıñ bozıluımı, oçış iminlege qağıydäläreneñ ütälmäweme - monı tizdän beläçäkbez” dip yazdı ul”.

Waqıyğa urınında barlıq berleklärneñ êşçänlege däwam itä.