Dneprğa raketalı höcüm

Rusiyä armiyase Ukrainadağı Dnepr şähärenä oyıştırğan raketa höcümendä 20 keşe ülde, 73 keşe yaralandı.

Ukraina däwlät aşığıç yärdäm xezmätennän yasalğan yazma açıqlawğa kürä rus köçläre Dneprğa raketa höcüme oyıştırdı.

Höcümdä ber bina cimerelgän, 20 keşeneñ ğomere özelgän. Alardan berse – bala.

Waqıyğa urınında êzläw-qotqaru êşläre däwam itä.

Yaralanuçılardan 14eneñ bala buluı citkerelde.

Ukraina prezidentı Vladimir Zelenskiy Rusiyä köçläreneñ kiçä kiç belän Dneprğa oyıştırğan höcümenä reakŝiya belderde.

Höcümdä 9 qatlı binanıñ cimerelüen äytkän Zelenskiy raketa höcümen terror höcüme bularaq bäyäläde.

Partnyer illärne Ukrainağa qoral yärdämen kürsätergä çaqırğan Ukraina liderı Rusiyä höcümnären tuqtatunıñ barı tik frontta köräş quyıp mömkin buluın belderde.

Zelenskiy citkergänçä rus köçläre kiçä ırğıtqan 30 tiräse raketadan 20dän artığı Ukraina hawa saqlanu köçläre tarafınnan yuqqa çığarıldı.

Kiyev mêrı Vitaliy Kliçko şähärneñ Dnepr bistäsendä kiçä irtänge sägät’lärdä şartlaw tawışlarınıñ işetelüen açıqlağan ide.