NATO-Awrupa Berlege urtaq beldergese
NATO belän Awrupa Berlege arasında xezmättäşlek däräcäsen kütärü, Rusiyä häm Qıtayğa qarşı xezmättäşlekne arttıru, Ukrainağa yaqlawnı däwam itü maqsatınnan çığıp urtaq belderge imzalandı
Urtaq beldergegä NATO Ğomum särkätibe Yens Stoltenberg, Awrupa Berlege komissiyası başlığı Ursula von der Leyen häm Awrupa Berlege Şurası başlığı Şarl’ Mişel’ Bel’giya başqalası Bryussel’däge NATO ştabında oyıştırılğan tantanada qul quydı.
2016nçı häm 2018nçe yıllarda imzalanğan beldergelär nigezendä äzerlängän yaña tekstta NATO-Awrupa Berlege xezmättäşlegeneñ urtaq qıymmätlärgä nigezlänüe, bügen Awrupa-Atlantika töbägeneñ soñğı yıllarnıñ iñ zur qurqınıçı belän oçraşuı, Rusiyäneñ Ukrainadağı suğışınıñ xalıqara xoquqnı bozu dip iğ’lan itelüe belderelde.
"Rusiyäneñ suğışı Awrupada häm dönyada iminlekkä häm totrıqlılıqqa zıyan kiterä," – dip äytelgän beldergedä Rusiyäneñ agressiyası iñ kisken räweştä xökem itelde.
NATO häm Awrupa Berlege, Rusiyä citäkçelegen xärbilären Ukrainadan aşığıç räweştä çığarırğa çaqırıp, Ukrainağa yärdämneñ qaqşamas buluına häm däwam itäçägenä basım yasadı.
Avtoritar aktyorlarnıñ NATOnıñ häm Awrupa Berlegeneñ mänfäğätlären sınap qarawı iskärtelep uzılğan beldergedä: "Bez artqan strategik köndäşlek çorında yäşibez. Qıtaynıñ artqan taläbe häm säyäsätläre – bez çişärgä tiyış bulğan problemalarnı kürsätä,” – dip äytelde.
Beldergedä Awrupadağı zäğıyf häm totrıqsız torışnıñ strategik köndäşlärgä, terror oyışmalarına uñaylı nigez äzerläwe citkerelde.
Mondıy çorda Amerika Quşma Ştatları belän bağlanışlarnıñ möhimlegenä basım yasalğan beldergedä Awrupa-Atlantika töbägendä kümäk saqlanunıñ nigezen NATOnıñ täşkil itüenä işarät itelde häm "tağın da köçleräk Awrupa saqlanuınıñ” ähämiyäteneñ qabul itelüe, monıñ NATO belän tulılandıruçı buluı zarurlığın bilgeläp uzıldı.
Beldergedä: "Bez oçraşqan iminlek yanawları häm sınawlar masştabı häm zurlığı yağınnan kübäygäne öçen urtaqlığıbıznı ozaq möddätle xezmättäşlegebez nigezendä çirattağı basqıçqa kütäräçäkbez,” – dip äytelde.
Xezmättäşlek arttırılaçaq ölkälär bigräk tä geostrategik köndäşlek, çıdamlıq mäs’äläläre, kritik asqormalarnıñ saqlanuı, artqan cimerüçe texnologiyalar, ğaläm, klimat üzgäreşläreneñ iminlek yoğıntıları belän çit il qatışuları, intervenśiyäläre häm mäğ’lümat manipulaśiyäläre räweşendä bilgeläp uzıldı.
