"Rusiyäneñ utnı tuqtatu qararı yalğan häm ikeyözle"

Awrupa Berlege Rusiyäneñ pravoslavlar Raştuası waqıtında utnı tuqtatıp toru qararın “yalğan häm ikeyözle” dip atadı.  

Awrupa Berlege şurası räise Çarl’z Mişel’ Rusiyä däwlät başlığı Vladimir Putinnıñ rus armiyäsenä utnı tuqtatu kürsätmäse nisbätennän sośial mediada belderü yasadı. Ul Kreml’ne “agressiv”, ukrainnarnı “qorban” dip atadı häm tınıçlıqnı täêmin itüneñ berdänber yulınıñ rus xärbiläreneñ Ukrainadan çığuı ikänen äytte.

“Ber’yaqlı utnı tuqtatu iğ’lanı qanunsız häm yäm’sez annekśiyälär, alarğa iyärep kilgän referendumnar şikelle ük yalğan häm ikeyözle,”-dide Çarl’z Mişel’.

AQŞ däwlät departamentı süzçese Ned Prays ta Putinnıñ armiyäsen qabattan cıynaw yäisä dön’yanıñ başın butaw öçen utnı tuqtatu iğ’lan itkän buluın uylawın äytte. Ul Rusiyäneñ Yaña yılda Ukrainanıñ asqormasına köçle höcümnär oyıştırğannan soñ utnı tuqtatu qararı çığaruın mısqıllawçı ğamäl bularaq bäyäläde.

“Ägär maqsat Ukraina xalqına qarşı tağın da kübräk üç aluçı, räximsez häm yuq itüçe höcümnär oyıştıru öçen köç tuplaw bulsa, bu utnı tuqtatu sanalmıy. Ägär Rusiyä tınıçlıq tözü häm bu suğışnı tuqtatu mäs’äläsendä citdi bulsa, köçlären Ukrainanıñ suveren cirlärennän çığarsın,”-dip söyläde Ned Prays.

Putin pravoslavlarnıñ Raştua bäyräme uñayınnan Rusiyä saqlanu ministrlığına Ukrainada bügen cirle waqıt belän säğat’ 12dän başlap 36 säğat’lek utnı tuqtatu kürsätmäse birde.