Dön'yada Yaña yıl töne görläp uzdı

Dön’yanıñ här poçmağında xalıq 2023nçe yılnı şatlanıp häm yaxşığa ömetlänep qarşı aldı.

Amerika Quşma Ştatlarında bäyräm çaralarınıñ üzäge N’yu-Yorktağı Tayms Mäydanı buldı. Anda meñnärçä keşe Yaña yılnı feyerverk häm yaqtılıq şowları belän qarşı aldı.

Awrupada da xalıq şaw-gör kilep mäydannarğa tuldı.

Germaniyäneñ başqalası Berlinda tarixi Brandenburg qapqasında häm tanılğan televideniye manarası urnaşqan urında kük yözen feyerverklar yaqtırttı.

Franśiyä başqalası Parijda Şanz-Êlize uramı häm Triumfal’ arka urnaşqan cirdä alma töşärlek tä urın qalmağan ide. Anda yaqınça 8 minut buyı meñnärçä feyerverk kük yözen törle töslär belän yaqtırttı.

Angliya başqalası Londonda tanılğan säğat’ manarası Big Bennıñ kıñğırawları çıñladı. Säğat’ näq’ tön urtasına kilgändä feyerverk başlandı. Tayms yılğası yarı da xalıq belän tulğan ide. London küze dip ataluçı Awrupanıñ iñ biyek “şaytan tägärmäçe” isä Ukraina bayrağı töslärendä yaqtırtıldı.

İtaliyäneñ Rim şähärendä dön’yağa tanılğan simvol ob’yekt Kolizey tiräsendä cıyılğan turist häm watandaşlar Yaña yılnı bäyräm itte. Küñel açu çaraları qısalarında feyerverklar oçırtıldı.

İñ ğacäyep bäyräm itülärneñ berse Berläşkän Ğaräp Ämirleklärendä buldı. Dubayda Ginnes rekordlar kitabına kerü öçen tırıştılar. Anda dön’yadağı iñ ozaq däwam itüçe feyerverk şowı öçen 15 meñ nano yaqtırtqıç häm 3 menñän artıq dron belän törle formalar barlıqqa kiterelde. Dön’yadağı iñ ozın bina Burç Xalifanı da Yaña yıl öçen bizädelär.  

Azärbaycan başqalası Baqıda yaña yılnı feyerverk şowı belän qarşı aldılar.

Qıtaynıñ koronavirus kilep çıqqan Uxan’ şähärendä isä xalıq bäyräm çaralarına bitlek kiyep kilde.  

2023nçe yılğa berençe bulıp kergän däwlät Tın okeandağı Tonga ide. Annan soñ Yaña Zelandiyä belän Avstraliyä kerde.