Kosovoda barrikadalar sütelde

Kosovonıñ tön’yağındağı Zveçan töbäge Rudar cirlegendä quyılğan barrikadalarnıñ alınuı belän Tön’yaq Mitroviśa-Leposaviç avtomobil’ yulı xäräkät öçen açıldı.

Rudardağı barrikadanı serblar 24 säğat’ almaş-tilmäş saqlıy ide. Çönki annan Kosovo belän Serbiyä arasındağı çik qapqasına iltüçe iñ ähämiyätle yul ütä.

Kosovonıñ tön’yağında serblar qorğan barrikadalarnıñ kübese alınğan ide. Alarnı älege ildä êlekkege poliśiyä xezmätkäre serb Deyan Pantiçnıñ qulğa alınuına reakśiyä bularaq quyalar. Qulğa alu qararı öy totığına almaştırılğannan soñ Serbiyä ilbaşı Aleksandr Vuçiç çärşämbe könne barrikadalarnı sütärgä çaqırdı.