"Ukrainanıñ 1800dän artıq şähär häm awılın qotqardıq"

Ukraina däwlät başlığı Volodimir Zelenskiy 24nçe fevral’dän birle baruçı suğışta Rusiyä köçläre qulğa töşergän 1800dän artıq toraq punktta qabat kontrol’ täêmin itülären citkerde. Ul başqala Kiyevta Ukraina parlamentına möräcäğat’ itep çığış yasadı häm anda il xalqınıñ dön’yağa berdämlek ürnägen kürsätüenä basım yasadı.  

Zelenskiy Rusiyäneñ höcümnärenä täwäkkäl räweştä qarşılıq kürsätüne däwam itülären söyläde. “Ukraina, hiçşiksez, otaçaq,”-dide ul.

Ukraina liderı Awrupa Berlege illäreneñ qoral belän bulışuların äytep: “Häm tarixta berençe tapqır Awrupa Berlege bu tördäge zur külämle höcümnärgä qarşı saqlanırğa yärdäm itä,”-dip söyläde.  

Zelenskiy üzlärenä teläktäşlek kürsätüçe däwlätlärgä räxmäten citkerde häm bu qorallar yärdämendä Ukraina armiyäseneñ uñışlı kontratak başqaruın belderde. “Ukrainanıñ 1800dän artıq şähär häm awılın basıp aluçılardan qotqara aldıq,”-dide ul häm il xalqınıñ küptänge xıyalı ciñügä taba baruların assızıqladı.

Zelenskiy BMO häm Türkiyäneñ yärdäme belän buldırılğan Qara diñgez aşlıq iniśiativası näticäsendä Ukraina portlarınnan 15 million tonnadan artıq tovarnıñ êksportlanuın da äytep uzdı. Ul monı tormışqa aşıru öçen kertkän öleşläre öçen BMO ğomum särqatibe Antonio Guterriş häm ilbaşı Räcäp Tayyip Ärdoğanğa räxmätle buluların, üzläreneñ dä moxtac illärgä awıl-xucalığı tovarların ireşterü öçen “ukrainadan aşlıq” temalı iniśiativa başlawların, Türkiyäne dä kertep, 30ğa yaqın däwlätneñ moña teläktäşlek kürsätüen söyläde.