BMO Talibannı xatın - qızlarğa qağılşlı qararlarnı ğamäldän çığarırğa öndäde

Berläşkän Millätlär Oyışması iminlek şurası Talibannı xatın - qızlarnıñ sośial’ tormışta qatnaşuın çikläwçe qararlarnı ğamäldän çığarırğa öndäde.

İminlek şurası belderüendä Talibannıñ xatın - qızlarnıñ yuğarı uqu yortlarına kerülären tuqtatuına borçılu citkerelde.

Altınçı sıynıftan soñ äfgan qızlarınıñ mäktäpkä baruına qomaçawlağan qarar ğayeplängän belderüdä Äfganstandağı xatın –qızlarnıñ häm qız balalarnıñ ildä tulı, tigez ,mäğ’näle qatnaşuı taläp itelde.

Şura Talibannı mäktäplärne açarğa, keşe xoquqlarına häm töp ireklärenä xörmättä “könnän kön üsä baruçı êroziyanı simvollaştıruçı” säyäsät häm ğamällärne kiresenä üzgärtergä çaqırdı.

Xatın-qızlarnıñ  Äfganstandağı ictimaği oyışmalarda häm xalıqara oyışmalarda êşläwen tıyunı beterüne taläp itkän şura,bu tıyunıñ ildäge gumanitar yärdäm operaśiyälärenä zur yoğıntı yasayaçağn assızıqladı.

Taliban 24 nçe dekabr’dä Äfganstanda êşçänlek başqaruçı ictimaği oyışmalarda xatın - qız personal êşlätüne kiläse belderügä qadär tuqtattı.

Taliban waqıtlı xökümäteneñ iq’tisad ministrlığı süzçese Abdurraxman Xäbib ministrlıqnıñ bu qararnı ilneñ barlıq ictimaği oyışmalarına cibärüen häm anıñ ütälergä tiyeşlegen belderde.

Xatın  - qız xezmätkären êştän çığarmağan ictimaği oyışmalarnıñ liśenziyäläre ğamäldän çığarılaçaq diyelde.

Taliban waqıtlıça xökümäteneñ Yuğarı belem birü ministrlığı 20 nçe dekabr’dä ildäge barlıq däwlät häm şäxsi universitetlarğa yäş’ qızlarnıñ belem aluı belän bäyle kürsätmä cibärde, anda uqularnıñ kiläse belderügä qadär tuqtatılıp toruı citkerelde. 

Uzğan yılnıñ 15 nçe avgustında Taliban Äfğanstan idaräsen üz qulına alğannan soñ däwlät häm şäxsi tarmaqta êşläwçe küp xatın - qız êşsez qaldı.