Yaponiyädä qar arqasında ülemnär arta

Yaponiyäneñ törle töbäklärendä köçle qar yawu kiterep çığarğan afät häm hälakätlärdä ğomere özelüçelär sanı 17gä citte. Däwlät telekanalı NHKğa qarağanda, dekabr’ ayı urtasınnan birle ilneñ tön’yaq häm könbatış cirleklärendä xakimlek itüçe burannar tormış şartlarına naçar yoğıntı yasıy.

Yanğın häm afät idaräse belderüendä qar arqasında ülüçelärneñ 17gä citüe, yaralanuçılar sanı 93 buluı äytelä.

Yaponiyä meteorologiyä agentlığı ilneñ tön’yaq-könbatış töbäklärendä bik küp cirlektä qar qalınlığınıñ ğadättägedän 3 tapqır artıq buluın xäbär itä. Köçle yawım-töşemnär säbäple hawa häm timer yul säfärlärendä özekleklär barlıqqa kilä.