"Qullanmağan darularnı awıruçılarğa biregez"

Germaniyädä gripp oçraqları, sulış yulları virusı RSV, koronavirus yoqtıruçılarnıñ artuı, mediśina xezmätkärläreneñ citmäwe häm darular probleması sälamätlek saqlaw sistemasında krizis kiterep çığardı.

Nemeś tabibları berlege başlığı Klaus Reynxardt “Tagesspiegel” gazetına interv’yusında qayber darularnı täêmin itüdäge qıyınlıqlarğa iğ’tibar yünältte häm xalıqnı ber-bersenä yärdäm itärgä çaqırdı. Ul bu nisbättän apteçkalardağı qullanılmağan preparatlarnı êşkä cigärgä mömkin buluın belderä.

“Sälamät bulsağız, qul astığızdağı darularnı awıruçılarğa biregez. Darular öçen bet bazarı şikelle satu urını buldırığa kiräk,”-di Klaus Reynxardt.

Germaniyä xastaxanälär berlege räise Djeral’d Gass mediśina xezmätkärlärendä 9-10% kimü buluın belderde. “Bu yaqınça här 10 xezmätkärneñ berseneñ awıru buluın añlata,”-di ul.

Gass, kizü çirlär yoqtırğan personalğa östäp, Kovid-19, balalarda yış küzätelüçe gripp häm RSV sulış yulları virusı arqasında problemanıñ tağın da üsüen assızıqlıy.

Belgeçlär sälamätlek saqlaw sistemasındağı qıyınlıqlarnıñ monıñ belän genä çiklänmäwen citkerä. Alar mediśina iminiyäte şirkätlärendäge byurokratiyädän dä şiqayät’ itä. Monnan tış, sälamätlek saqlaw tarmağında kvalifikaśiyäle belgeçlärneñ citmäwe dä ayırım problema bulıp tora. Här yıl layıqlı yalğa kitüçe yözlärçä meñ xezmätkärneñ urını tutırılmıy.