Qaçaqlar lager'larında xolera tarala

Keniyädäge qaçaqlar lager’larında xoleradan 3 keşeneñ ğomere özelgän.

Bu xaqta Xalıqara qotqaru komitetınıñ Keniya direktorı Möxämmäd Äl Montassisr belderä.

Montassir äytüençä, xolera êpidemiyäsendä kim digändä 3 keşe ğomeren yuğaltqan, 504 keşe däwalana.

Ul Keniyädäge Dadaab häm Kakuma qaçaqlar lager’larında 500 meñnän artıq keşe yäşäwen belderep:”Lager’larda kirägennän artıq keşe yäşi, asqorma äybät tügel”,-di.

Montassir bilgeläp uzğança, lager’larda keşe küp bulu arqasında bädräflär citmi, yañğırlar az bulu säbäple gigiyena şartları naçarayğan.

Soñğı könnärdä töbäktäge xastaxanälärdä dä keşe sanı artqan, xolera êpidemiyäse balalarğa ayıruça zur yoğıntı yasıy.

Somali häm Kön’yaq Sudandağı bäreleşlär, qorılıq arqasında meñlägän keşe Keniyädäge qaçaqlar lager’larına sıyınalar.

"Vibrio" dip atalğan bakteriya arqasında kilep çıqqan xolera azıq-tölek häm su aşa yoğa.

Köçle êç kitügä häm organizmda su yuğaltuğa kiterä torğan xolera, däwalanmasa, ülemgä kiterergä  mömkin.