BMO Süriyägä yärdämen däwam itteräçäkme?

Türkiyä, Könbatış illäre häm Berläşkän Millätlär Oyışması Cilvegözü çik buyı qapqasınnan Süriyägä xalıqara gumanitar yärdämnär cibärelgän mexanizmnı yañartırğa çaqırdı.

BMO İminlek Şurası cıyılışında çığış yasağan Türkiyäneñ BMO Daimi wäkile Feridun Sinirlioğlu gumanitar krizisnıñ ozınayuı häm artuçı ixtıyaclar arqasında tormış qotqaruçı gumanitar yärdämnärne täêmin itüneñ kritik ähämiyättä buluın äytte.

“Çik ar’yağı yärdäm mexanizmı Süriyäneñ tön’yaq-könbatışında yäşäwçe millionnarça keşe öçen ışanıçlı gumanitar yärdäm liniyase buluın isbatladı. Monnan tış uqu-uqıtu, saqlaw häm sälamätlek saqlaw xezmätlärendä zur yärdäm dä bar,” – dide törek wäkile.

İrlandiyaneñ BMO daimi wäkile Fergal Mythen dä barlıq ireşü kanalların däwamlı açıq totarğa çaqırdı.

Amerika Quşma Ştatlarınıñ BMO daimi wäkile yärdämçese Robert Vud isä Berläşkän Millätlär Oyışmasınıñ çik ar’yağı yärdäm mexanizmınıñ dön’yadağı iñ ışanıçlı häm ütä kürenmäle operaŝiyalärdän berse buluın belderde.

BMOnıñ Gumanitar êşlärdän cawaplı ğomüm särqätip yärdämçese Martin Griffits soŝioêkonomik bozılunıñ krizis başlanğannan birle iñ naçar wazğıyät’tä buluın açıqladı, gumanitar yärdäm mexanizmın däwam itterüneñ ähämiyäten assızıqladı.

Rusiyäneñ BMO daimi wäkile Vasiliy Nebenzya Könbatış illären Süriyägä qarağan gumanitar yärdäm mexanizmın säyäsätläşterüdä ğayepläp: “Berniçek tä qabul itep bulmıy,” – dide.

Berläşkän Millätlär Oyışmasına kürä 2023 yılda yaqınça 15 million 300 meñ keşe gumanitar yaqlaw häm yärdämgä ixtıyac toyaçaq.

Ozaq waqıttan birle däwam itüçe yärdäm mexanizmı 2023 yılnıñ 10 ğıynwarında azağına yaqınlaşa.

BMO İminlek şurası 2014tä qabul itkän qarar ölgesenä kürä Süriyäneñ tön’yaq-könbatışındağı töbäklärgä xalıqara yärdäm cibärelä.

Yärdäm programmasınıñ ozınaytıluı öçen Şurasnıñ 5 daimi äğzasennän (Rusiyä, Qıtay, AQŞ, Franŝiya häm Angliya) berseneñ dä qarşı kilmäwe şartı belän kim digändä 9 äğzaneñ raslawı kiräk.