Äfğanstanda qızlarğa universitetqa yul yabıldı

Taliban yuğarı uqu yortlarında xatın-qızlarnıñ belem aluın tuqtatıp toruların belderde

1921695
Äfğanstanda qızlarğa universitetqa yul yabıldı

Äfğanstanda qızlarnıñ universitetta uquı tuqtatılıp tora. Bu xaqta Taliban waqıtlıça xökümäteneñ Yuğarı belem birü ministrlığı süzçese Xafiz Ziya Xaşimi belderde. Anıñ äytüençä, ildäge barlıq däwlät häm şäxsi universitetlarğa yäş’ qızlarnıñ belem aluı belän bäyle kürsätmä cibärelde. Anda uqularnıñ kiläse belderügä qadär tuqtatılıp toruı citkerelä.  

Amerika Quşma ştatları däwlät departamentı süzçese Ned Prays Talibannıñ universitetlarda student qızlarnıñ uquın tuqtatuın qabul itelmäs buluın häm moña sankśiyälär belän cawap biräçäklären belderde. Ul älege qararnıñ Äfğanstan xalqınıñ yartısın belem aludan mäxrüm itäçägen assızıqlıy.

Prays äfğan xatın-qızlarınıñ yıl sayın iq’tisadqa 1 milliard dollardan artıq öleş kertüen, Talibannıñ isä monı kirtälärgä mataşuın belderde.  

Uzğan yıl 15nçe avgustta Äfğanstan idaräsen üz qulına töşergän Taliban başlangıç mäktäplär häm universitetlarda qızlarnıñ belem aluın röxsät itte. Barı yuğarı uqu yortlarında xatın-qız häm ir-at studentlarnıñ däresläre törle könnärgä bilgelände. Urta häm yuğarı sıynıflarda isä qızlarğa uqu röxsät itelmäde. Taliban wäqalätleläre qızlar öçen mäktäplärneñ islam dine qısalarında qabat tärtipkä salınıp tizdän açılacağın xäbär itsä dä, bu tormışqa aşmadı.



Bäyläneşle xäbärlär