"Putinnıñ ber planı da barıp çıqmadı"

Germaniyä xökümäte räise Olaf Şol’ś Rusiyä däwlät başlığı Vladimir Putinnıñ plannarınıñ berseneñ dä barıp çıqmawın äytte. Ul Bel’giyä başqalası Brüssel’dä uzaçaq Awrupa Berlege- ASEAN sammitı häm Awrupa liderları sammitı aldınnan federal’ parlamentta çığış yasadı.  

Şol’ś Rusiyäneñ 24nçe fevral’dä Ukrainağa qarşı başlağan suğışınıñ borılış noqtası buluın qabatladı. Ul Awrupa Berlege liderlar sammitında kütäreläçäk temalarnıñ Putinnıñ Awrupa qıytğasına kitergän xälneñ citdilegen çağıldıraçağın belderde.   

Şol’ś Rusiyä başlığınıñ yalğış isäp yasawın söyli: “Putin ğaskärläreneñ Ukrainanı berniçä kön êçendä alaçağına, Awrupada bezneñ häm demokratik könbatışnıñ Ukrainağa näticäle räweştä yärdäm itä almayaçaq qadär bülengän buluına häm gaz borğıçların yabıp Awrupanıñ teläktäşlegen yuq itäçägenä ışandı. Tik Putinnıñ ber planı da barıp çıqmadı”.

Kanśler Ukrainanıñ Rusiyä agressiyäsenä qarşı toruın häm kiräk bulğan qadär Kiyevqa yärdäm itäçäklären söyläde. Ul 2023nçe yılda Ukrainağa Awrupa Berlegennän 18 milliard yevro yärdäm täêmin itäçäklären dä xäterlätte.

Şol’ś Rusiyägä qarşı sankśiyä basımınıñ da tuqtamayaçağın assızıqlap: “Putin ayawsız suğışnı däwam itkän sayın Rusiyägä qarata sankśiyälär bulaçaq häm qırıslaşaçaq,”-dide.

Germaniyä kanślerı ênergiyä täêmin itü mäs’äläsendä uñışqa ireşülären, kiläse atnada Vil’gel’msxafen şähärendä sıyıq gaz terminalın açuların, monnan soñ başqa terminallar da bulaçağın citkerde.     

Olaf Şol’ś Könbatış Balkan däwlätläreneñ Awrupa Berlegenä kerüe öçen tırışaçaqların assızıqladı häm Balkannarda êlekkegedän qalğan problemalarnı çişü mömkin ikänen äytte.