İzrail-Fälästin öçen ike däwlätle çişeleş mömkinlekläre

Awrupa Berlege komissiyası äğ’zase Helena Dalli Franśiyanıñ Strazburg qalasında oyıştırılğan Awrupa parlamentı ğomum şurasındağı "İzrail-Fälästin öçen ike däwlätle çişeleş mömkinlekläre" temalı utırışta Awrupa Berlege komissiyası isemennän çığış yasadı.

Bıyıl 120 fälästinleneñ İzrail köçläre tarafınnan üterelüen belderüçe Dalli: "Berläşkän Millätlär Oyışması ülem sannarın sistemalı räweştä terkäp bara başlağan 2005nçe yıldan birle 2022nçe yıl Yordannıñ könbatış üzänlegendä fälästinlelär öçen iñ küp ülemnär terkälgän yıl buldı”, - dip äytte.

Dalli fälästinle balalar öçen dä şuşındıy uq räweşle iñ küp ülem terkälgän yılnıñ 2022nçe yıl buluın, 34 fälästin balasınıñ İzrail köçläre yäki yähüd küçep kilüçelär tarafınnan üterelüen iskärtep uzdı.

İzraildäge höcümnärdä dä 20 izrailleneñ ülüen belderüçe Dalli bolarnıñ artında İzrailneñ Fälästindä küp sanda höcüm oyıştıruın xäterlätte. Taraflarnı totnaqlıqqa çaqıruçı Dalli: "Köç qullanu proporśianal’ häm xalıqara xoquqqa yaraşlı bulırğa tiyış”, - dip äytte.

Dalli, xäzerge nigezdä İzrail-Fälästin mäs’äläsenä ike däwlätle çişeleşneñ yıraq kürenüen belderep: "Fäqät başqa al’ternativa yuq. İke däwlätle çişeleş ike tarafnıñ xalıqlarına tınıçlıq, totrıqlılıq häm tigez xoquqlar urnaştıruı öçen iñ yaxşı yul. Şuña kürä Awrupa Berlege Yaqın Könçığış tınıçlıq barışın canlandırunıñ yulların êzläw öçen Yaqın Könçığıştağı urtaqları, AQŞ häm başqa aktyorlar belän aktiv bularaq êşli”, - dip äytte.

İzrailneñ qayber ğaräp illäre belän mönäsäbätlärne cayğa salu öçen kileşülär tözüen xäterlätüçe Dalli bu wazğıyätne Yaqın Könçığış tınıçlıq barışın tizlätü öçen qullanu ixtimalların tikşerülären iskärtep uzdı.