İranda 1200 student ağulandı

Ber'yulı 4 universitetta bulğan oçraqlarğa studentlar şöbhälänep qarıy

1916072
İranda 1200 student ağulandı

İranda ike atnada 4 universitetta yaqınça 1200 studentnıñ aşaw-êçüdän ağulanuı belderelde.

Yarımräsmi İran studentlar xäbär agentlığında çıqqan mäğ’lümatqa qarağanda, İsfaxan texnologiyä universitetı, Käräc Xaräzmi universitetı, Arak texnologiyä universitetı häm Tährannıñ Allamä Täbatäbay isemendäge universitetında uquçılarda uzğan atnada ağulanu bilgeläre kürenä.

Reformist “Êtemad” gazetınıñ älege mäs’älä belän bäyle xäbärendä universitetlarnıñ barı kerem alu maqsatı belän êşläwçe şirkätlärgä tender birüe, näticädä naçar şartlarda äzerlängän rizıqlar häm sıyfatsız azıq-tölekneñ studentlarnıñ ağulanuına kiterüe citkerelä.

Uquçılar isä 4 universitetta ber ük waqıtta bulğan waqıyğağa şöbhälänep qarıy.

İran studentlar berlegeneñ Telegram akkauntı aşa citkergän yazmasında ağulanu oçraqlarınıñ planlaştırılğan 3 könlek protestlar aldınnan uq buluına iğ’tibar cälep itelä.

Başqala Tähranda 13nçe sentyabr’dä äxlak poliśiyäse saq astına alğannan soñ xäle naçarayıp xastaxanägä salınğan Mäxsä Äminineñ 16nçı sentyabr’dä ğomere özelüe il idaräsenä qarşı rizasızlıq çaraları kiterep çığardı.

İran iminlek şurası protest çaralarında 200dän artıq keşeneñ ülüen belderde.

Norvegiyädä êşläwçe İran keşe xoquqları üzäge isä uram çaralarında iminlek köçläreneñ tıqşınuı arqasında 448 demonstrantnıñ hälaq buluın citkerä.

Rizasızlıq çaraları universitetlarda da taraldı häm bik küp student bu nisbättän saq astına alındı, ber öleşe izolyatorda totıla. Soñğı könnärdä isä sośial’ media aşa universitetlarnı da üz êçenä aluçı boykot, êş taşlaw häm yabu çaqıruları yasaldı.



Bäyläneşle xäbärlär