İrannıñ Dön'ya kubogında ciñelüenä söyenüçene atıp üterdelär

Maşinasınıñ signalına basqan öçen iminlek köçläre aña ut aça...

1913496
İrannıñ Dön'ya kubogında ciñelüenä söyenüçene atıp üterdelär

FİFA dön’ya kubogında İran futbol cıyılma komandasınıñ AQŞqa ciñelep yarışlardan töşep qaluın bäyräm itüçe ber protestçını atıp üterdelär.

Norvegiyädäge İran keşe xoquqları oyışması belderüenä qarağanda, 27 yäş’lek Mäxran Semak Gilan töbägeneñ Bändär Änzäli şähärendä “ciñelüne bäyräm itü” çarası waqıtında hälaq bula. Maşinasınıñ signalına basqan öçen iminlek köçläre aña ut aça. Yegetne başına atıp üterälär.   

İran cıyılma komandası futbolçısı Said İzzätullaxi İnstagram akkauntında moña bäyle yazma urtaqlaştı. Üterelgän keşe anıñ balaçaq dustı ikän. Futbolçı ikese bergä töşkän fotonuı urtaqlaşıp bolay dip yazdı: “Kiçäge açı ciñelüdän soñ sineñ ülem xäbäreñne işetü yörägemne tağın da qatıraq ärnette. İske dustım, sin dä beläseñ, bu dön’yada keşelek här kön sayın kimi bara”.  

Katarda uzuçı Dön’ya kubogında İran AQŞqa 1-0 ottırğannan soñ ilneñ törle şähärlärendä törkemnär uramnarğa çıqtı häm şiğar’lär qıçqırıp, feyerverklar attırıp “ciñelüne bäyräm itte”.  



Bäyläneşle xäbärlär