Qıtay Ayda baza tözergä niyätli

Atom-töş ênergiyäse belän êşläwçe bazanıñ tözeleşen 2028nçe yılğa qadär tögällärgä planlaştıralar

1911084
Qıtay Ayda baza tözergä niyätli

Qıtay Ayğa keşele säfärlär başlağançı atom-töş ênergiyäse belän êşläwçe bazanıñ tözeleşen 2028nçe yılğa qadär tögällärgä planlaştıra.

Aynı tikşerenü programmasınıñ baş dizaynerı Vu Veyrin däwlät telekanalına interv’yusında tirän ğalämdäge missiyälär turında mäğ’lümat birde.

Qıtay 2019nçı yılda “Çan’i 4” robotlaştırılğan apparatın Aynıñ qarañğı yağına utırttı häm monı başqarıp çıqqan berdänber däwlät buldı. Şunnan soñ, 2021nçe yılda oçırtılğan “Çan’i 5” tikşerenü apparatı iyärçenneñ öslegennän cıyğan taş häm tufraq ürnäklären Cirgä kiterde.

Vu äytkänçä, Qıtay mifologiyäsendä Ay alihäse isemen yörtüçe tikşerenü missiyälärenä kiläse yıllarda yañaları östäläçäk. “Çan’i 6” Aynıñ qaranğı öslegennän taş häm tufraq ürnäkläre cıyaçaq. “Çan’i 7” isä anıñ kön’yaq qotıbın tikşeräçäk.

2028nçe yılğa planlaştırılğan “Çan’i 8” missiyäse belän Aynıñ kön’yaq qotıbında fänni stanśiyäneñ nigezen barlıqqa kiterüçe baza qoru maqsatı quyıla. Anıñ orbitada ber iyärçene, töşep utıru şattlı, oçuçı tikşerenü apparatı, tägärmäçle tikşerenü texnikası häm başqa cihazları bulacağı äytelä.

Vu stanśiyäneñ atom-töş ênergiyäse belän êşläyäçägen uylawların belderä. “Ay stanśiyäseneñ ozaq waqıtlı häm yuğarı ênergiyä ixtiyacların qanäğat’länderü öçen bez yaña sistema êşlibez,”-di ul.

Vu Qıtaynıñ äle Marsta tikşerenü êşçänlege alıp baruın xäterlätä. Anıñ äytüençä, Yupiter, Uran häm Asteroidlar quşağın öyränü öçen dä missiyälär buldıru planlaştırıla. Qıtaylarnıñ Qoyaş sistemasınıñ çitenä tirän ğaläm küzätü iyärçene cibärü niyäte bar.  



Bäyläneşle xäbärlär