Rus yutuberları Dudanı qapqınğa töşerde

Pol’şa ilbaşı Andjey Duda qabat Rusiyä yutubçılarınıñ qapqınına töşte. Bu yulı anıñ belän telefonnan Franśiyä däwlät başlığı Êmmanuêl’ Makron isemennän söyläşkännär. İlbaşı idaräse dä Dudanıñ uzğan atnada Makron buluın äytkän ber keşe belän äñgämä qoruın rasladı.

Belderüdä äytelgänçä, 15nçe noyabr’dä Pol’şanıñ Ukraina çigenä yaqın cirlekkä raketa töşüennän soñ ilbaşına bik küp wäqalätle şaltıratqan. Şularnıñ berse Vovan häm Leksus quşamatlı rus prankerları Vladimir Kuzneśov belän Aleksey Stolyarov bula. Alar “Youtube”ğa quyğan yazmada Dudanıñ Makron buluın uylağan keşegä waqıyğa uñayınnan şaltıratuı öçen räxmät äytüe añlaşıla. Pol’şa ilbaşı raketa turında centekläp söyli, NATO belän fiker alışırğa teläwen häm Ukrainanı basıp alğan Rusiyä belän wäzğıyät’ne tağın da naçaraytmaw öçen bik iğ’tibarlı buluın citkerä. 7 minuttan artıq däwam itkän äñgämädä Duda AQŞ ilbaşı Djo Baydennıñ raketa öçen Rusiyäne cawaplı totmawın, tik Ukraina däwlät başlığı Volodimir Zelenskiynıñ rus raketası buluın alğa sörüen añlata.

Rus prankerları 2020nçe yılda da Dudağa şaltıratıp BMO ğomum särqatibe Antonio Guterriş isemennän söyläşkän ide.

Kuzneśov häm Stolyarov monnan alda oxşaş ısullar belän Franśiyä ilbaşı Êmmanuêl’ Makron, Angliyäneñ êlekkege xökümät räise Boris Djonson, cırçı Êlton Djon, prinś Garri häm başqa tanılğan keşelär belän şayarttı.