Tarrant mäxkämä qararın şiqayät' itkän
Yaña Zelandiyädä mäçetlärgä höcüm itkän terrorçı ilneñ Yuğarı mäxkämäsenä şiqayät' cibärgän
2019nçı yılda Yaña Zelandiyä mäçetenlärendä höcüm oyıştırıp 51 keşeneñ canın qıyğan terrorçı mäxkämä qararın şiqayät’ itte.
İlneñ Yuğarı mäxkämäse Brenton Tarrantnıñ uzğan atnada möräcäğat’ itüen rasladı, tik utırışnıñ qayçan bulaçağın citkermäde.
İsegezgä töşeräbez, terrorçı 2019nçı yılnıñ 15nçe martında Kraystçyerç şähäreneñ Nur häm Linvud mäçetlärenä comğa namazı qılğan waqıtta höcüm itte. Anda xatın-qızlar häm balalarnı da kertep 51 keşeneñ ğomere özelde, 49ı isä yaralandı. Tarrant qanlı höcümne sośial’ media akkauntları aşa turıdan-turı êfirda kürsätte. Waqıyğadan soñ uq anı poliśiyä êläkterde.
Avstraliyädän kilgän terrorçınıñ höcümgä äzerlek öçen Dunedin qalasında öy arendalawı häm andağı poligonnarda atu künegüläre yasawı açıqlandı.
Tarrant 2020nçe yılnıñ 27nçe avgustında Kraystçyerç mäxkämäsendä 51 üterü, 40 ayırım keşe üterügä omtılış häm terrorçılıqta ğayeplänep ğomerlek törmägä xökem itelde. Cinayät’çe ğayepläwlärneñ barısın da qabul itte.
