“Klimat üzgäreşläre belän köräştä säwdä xezmättäşlege bik möhim”
Bötendönya säwdä oyışması ğomum direktorı Ngozi Okonjo-Iweala illärne klimat üzgäreşlärenä qarşı berdäm blok bulıp xäräkät itärgä çaqırdı
Ngozi Okonjo-Iweala Misırnıñ Şarm äl-Şäyh qalasında ütkärelgän Berläşkän Millätlär Oyışması klimat üzgäreşläre qısa kileşüeneñ 27nçe taraflar konferenśiyası qısasında oyıştırılğan matbuğat oçraşuında säwdädä xezmättäşlekneñ klimat üzgäreşläre belän köräştäge ähämiyätenä tuqtalıp uzdı.
Okonjo-Iweala global’ cılılıq artuın sänäğätkä qadärge çor belän çağıştırğanda 1,5 gradustan tübän totu maqsatı qısalarında global’ iq’tisadnı üzgärtü tırışularınıñ uñışlı bula aluı öçen säwdäneñ säyäsät alımnarına kertelüeneñ zarurlığın äytte.
Global’ problema bulğan klimat üzgäreşläre belän köräşneñ böten zur iq’tisadlar arasında xezmättäşlekne zarur qıluın häm uglerod çığarunı köçäytüçe faktorlarnıñ beterelüe öçen qullanılğan metodologiya häm alımnar ölkäsendä xezmättäşlekkä ixtıyac buluın belderüçe Okonjo-Iweala: "Klimat ğamäleneñ uñışına zarar kitermäw öçen bezgä iq’tisadlarnı ayırmasqa häm ayırım säwdä blokların buldırmasqa kiräk”, - dip äytte.
Klimat finanslawı mäs’äläsenä dä tuqtalıp uzuçı Okonjo-Iweala: "Berdäm blok bulıp alğa kitkän illärneñ cawaplılıqların üz östenä aluı häm çista ênergiyalı kiläçäkkä ğadel küçüne täêmin itü öçen ozaq waqıttan birle wäğdä itelgän 100 milliard dollarlık klimat finanslawı belän üsep kilüçe illärgä yärdäm kürsätüläre kiräk”, - dide.
Okonjo-Iweala dönyanıñ dürt ber yağınnan liderlarnı klimat üzgäreşlärenä ğadel häm ışanıçlı cawap birä alu maqsatınnan çığıp säwdä yul kartasın äzerläw öçen Bötendönya säwdä oyışmasına çaqırdı.
