İmran Xanğa attılar

Paqıstanda êlekkege xökümät räise İmran Xannıñ maşinasına ut açılğan häm säyäsätçe ciñelçä yaralanğan.

Angliyä xäbär agentlığı Reytersnıñ Paqıstan mediasına nigezlänüçe yazmasına qarağanda, İmran Xannıñ qorallı höcümdä ayağı zarar kürgän. Xäle awır tügel.  

İmran Xan irtä saylaw taläbe belän başqala İslamabadta ber protest çarasın citäkli. Ul teläktäşläre belän 28nçe oktyabr’dä Laxor şähärennän yulğa çığa. Älege konvoy İslamabadta barıp citep anda protest utırışı ütkärergä tiyeş bula. Alar ütä torğan 260 çaqrım yul buyınça bik küp iminlek köçläre saqlıy.

Beleşmä öçen: Paqıstanda 10nçı aprel’dä parlamentta Xan häm ul citäklägän xökümät öçen ışanıç kvotası tawış birüe ütkärelde. Tik säyäsätçe citärlek däräcädä tawışqa ireşä almadı häm wazıyfasınnan alındı. 11nçe aprel’dä anıñ urınına Şaxbaz Şärif bilgelände.

Paqıstan yuğarı saylaw komissiyäse İmran Xanğa qarata 21nçe oktyabr’dä, çit il däwlätläreneñ liderları häm wäkillärennän alğan räsmi büläklärne qanunsız räweştä satuı säbäple, 5 yıllıq säyäsi tıyu kertte.

Paqıstanda saylawlar kiläse yılnıñ oktyabrenä planlaştırıla.