Saxarov premiyäse bıyıl Ukraina xalqına birelä

Awrupa parlamentınıñ här yıl keşe xoquqları häm fiker irege ölkäsendä birelüçe Saxarov premiyäsenä bıyıl Ukraina xalqı layıq dip tabıldı.

Awrupa parlamentı räise Roberta Metsola Franśiyäneñ Strasburg şähärendäge utırışlar däwam itkän arada belderü yasadı. Ul büläkneñ Rusiyägä qarşı suğışuçı, qaçarğa mäcbür itelgän, yaqınnarın häm duşların yuğaltqan, ışanuları öçen köräşüçe ukrainalılarğa birelüen belderde. “Qıyu Ukraina xalqınıñ berqayçan da bireşmäyäçägen beläm. Bez dä bireşmäyäçäkbez,”-dide Metsola.

Awrupa parlamentı räise Rusiyäneñ 24nçe fevral’dä başlağan suğışınıñ Ukraina xalqına zur çığımnar kiterüen, alarnıñ barı öyläre, cirläre, bäysezleklären genä tügel, ber ük waqıtta demokratiyä, xoquqnıñ östenlege häm Awrupa qıymmätläre öçen suğışuın äytte.

Büläkneñ iseme Sovetlar Berlegendäge fizik häm säyäsi oppoziśioner Andrey Saxarov belän bäyle. Ul 1988nçe yıldan birle fiker bäysezlegen yaqlawçı şäxes yäisä oyışmalarğa birelä.

Bıyılğı büläkläw tantanası 14nçe dekabr’dä Strasburgta Awrupa parlamentı ğomum şurasında uzaçaq.

Saxarov premiyäse uzğan yıl rus oppoziśionerı Aleksey Naval’nıyğa birelgän ide.