Koronavirus kizüe tögällänmäde

Bötendön’ya sälamätlek saqlaw oyışması koronavirus kizüeneñ betmäwen, awırtu oçraqları kimesä dä, äle haman millionlağan çirläwçe barlığın belderde.

Oyışmanıñ baş süzçese Margaret Xarris Türkiyä teleradiokompaniyäsenä interv’yusında bolay dip söyli: “Uzğan atnanıñ oçraqlarında kimü küzätelüen qabul itäm, tik äle haman millionnarça yaña awırtu oçrağı küräbez. Barı uzğan atnada koronavirustan 90 meñ keşe ülde”.

Xarris “Êpidemiyä iğ’lan itüdä totqarlıq kilep çıqtımı?” sorawına cawap birep, älege mäs’äläneñ keşe başın butawçı buluın äytte. “Çınlıqta, bezneñ citkergän närsä - xalıqara mäydanda cämäğat’çelek sälamätlege mäs’äläsendä ğadättän tış xäl deklaraśiyäse ide häm bez anı ğıynvar axırında yasadıq. Bu iñ yuğarı däräcädä xäwef signalı. Xäzer bezne tawışıbıznı tağın da nığraq çığarmawıbız öçen ğayepli alasız, tik ul çaqta Bötendön’ya sälamätlek saqlaw oyışmasınıñ här könne daimi räweştä matbuğat cıyılışı ütkärüen bik yaxşı xäterlim,”-dip söyläde süzçe.

Xarris “Bötendön’ya sälamätlek saqlaw oyışması Qıtay belän mönäsäbätläre säbäple koronavirusnıñ çığanağın tikşermädeme?” sorawına da cawap birde. Ul monıñ döres bulmawın belderde. Xarris äytüençä, êpidemiologik xäldä totqarlaw yäisä yäşerü oçraqları bulmağan. “190nan artıq äğ’zabız bar häm bezneñ öçen barısı bertigez. Äğ’za illär belän söyläşülärebez, älbättä, yäşeren. Çönki bu diplomatik mönäsäbätlär,”-dip söyli Bötendön’ya sälamätlek saqlaw oyışması wäkile.

Xarris Türkiyäneñ kizü prośessında täcribä häm mäğ’lümat urtaqlaşuın maqtap telgä aldı.