Rumıniya häm Bolgariyä Şengen zonasına keräçäkme?

Awrupa parlamentı deputatları Rumıniya häm Bolgariyäneñ Awrupadağı vizasız säyäxät töbäge Şengenğa kertelüen soradı. Franśiyäneñ Strasburg şähärendä uzğan utırışta bu xaqtağı qarar ölgese 547 tawış belän qabul itelde. Aña barı 49 deputat qarşı çıqtı.

Dokumentta ike däwlätneñ 2022nçe yılnıñ axırına qadär Şengenğa kertelüe öçen Awrupa Berlege şurasınıñ aşığıç räweştä qarar çığaruı sorala. Uñay cawap birelsä, Awrupanıñ êçke çiklärendä älege ike il watandaşları öçen kertelgän kontrol’lär dä betereläçäk.

Deputatlar beldergänçä, Bolgariyä häm Rumıniyä Şengenğa kerü öçen kiräkle bulğan şartlarnı ütägän. Alar Awrupa däwlätläreneñ bu ike ilne älegä qadär çaqırmawın tänqıyt’läde. Deputatlar monıñ Awrupa berdäm bazarına zarar birüen äytä.  

Awrupa Berlegeneñ 27 äğ’zasınnan Bolgariyä, Rumıniyä, Xorvatiya, Kön’yaq Kipr grek idaräse häm İrlandiyä Şengen töbägenä kermi. İslandiyä, Norvegiyä, Şveyśariya häm Lixtenşteyn isä Awrupa Berlege äğ’zası bulmasa da Şengenda urın ala.

Awrupa parlamentı deputatları 2018nçe, 2020nçe häm 2021nçe yıllarda da Bolgariyä belän Rumıniyäne Şengenğa alu öçen qarar ölgese qabul itte.