Başqalada êboladan berençe ülem

Könçığış Afrika ile Uganda başqalası Kampalada êbola virusı arqasında berençe ülem oçrağı terkälgän.

Cirle matbuğattağı xäbärlärgä qarağanda, bu xaqta ilneñ sälamätlek saqlaw ministrlığı belderä.

Şulay itep il külämendä eboladan ülüçelär sanı 19 ğa citkän, virus belän zararlanuçılar 54 dip açıqlanğan.

İldä 19 nçı sentyabr’dä   24 yäş’lek ber keşedä  siräk oçrıy torğan Sudan variantı buluı belderelgän êbola virusı tabılğan ide.  

2000 nçe yıllar başında Ugandada yözlägän keşeneñ ğomeren özgän virustan soñğı tapqır 2012 nçe yılda 17 keşe ülde.

Êbola 2013 nçe yılnıñ dekabrendä Könbatış Afrikada taraldı.

2014-2017 nçe yıllarda Gvineya, Liberiya häm S’yerra-Leoneda bulğan êpidemiyädä 30 meñ keşe virus belän zararlandı häm 11 meñnän artıq keşe yaqtı dön’yadan kitte.