Awrupa Berlege referendumnı tanımıy

Awrupa Berlege Doneśk, Xerson, Lugansk häm Zaporojyedağı referendumnı häm anıñ näticälären tanımawın belderde

1886134
Awrupa Berlege referendumnı tanımıy

Awrupa Berlege Doneśk, Xerson, Lugansk häm Zaporojyeda Rusiyäneñ referendum uzdıruın qanunsız dip atadı häm anı tanımawın citkerde.

Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell ofisınnan yasalğan belderüdä älege referendum iñ köçle räweştä ğayeplänä.

“Awrupa Berlege bu qanunsız referendumnı, bolarnıñ yalğan näticälären häm aña qarap çığarılaçaq teläsä-qaysı qararnı berqayçan da tanımayaçaq häm barlıq BMO äğ’zaların da şunı uq êşlärgä çaqıra” diyelä belderüdä. Anda Rusiyäneñ bu yul belän Ukrainanıñ xalıqara qabul itelgän çiklären üzgärtergä mataşuı citkerelä.

Belderüdä mondıy yullar bar: “Rusiyäneñ qanunsız, yalğan referendumnarı bernindi legitimlıqqa iyä tügel häm Rusiyä, xalıqara yöklämälärdän tış, xalıqara xoquqnı da açıqtan-açıq boza. Referendumnar Rusiyä Ukrainağa qarşı suğış alıp barğanda häm Ukrainanıñ basıp alınğan cirlären annekśiyäläwne maqsat itep ütkärelde”.

İsegezgä töşeräbez, Rusiyä yaqlı separatistlarnıñ kontrolendäge Doneśk belän Luganskida, Rusiyä armiyäse qulğa töşergän Xerson häm Zaporoj’yeda uzğan referendumnarda “Rusiyägä quşılu” näticäse çığarıldı. Yänäse, qatnaşuçılarnıñ 98,42 %ı şunıñ öçen tawış birgän.

Awrupa Berlegeneñ Rusiyägä qarata açıqlağan 8nçe sankśiyälär paketında älege referendumnarnı oyıştırğan keşelärneñ dä isemlekkä kertelüe belderelde.



Bäyläneşle xäbärlär