İranda protestçılarnı xökem itäçäklär

İran mäxkämä idaräse başlığı Gulam Xösäyen Muxsini Êdjey ildä protestlarğa teläktäşlek kürsätüçelärneñ xökem iteläçägen belderde. Bilgele bulğança, 22 yäş’lek Mäxsa Amininıñ qulğa alınuınnan soñ ülüe İranda massaküläm rizasızlıq çaralarına kiterde.

Êdjey äytüençä, barı uramnarğa çığuçılar tügel, alarğa yärdäm itüçelär häm teläktäşlek kürsätüçelär dä ğayeple, alar da xökemgä tartılaçaq. Räsmi zat ildä däwam itüçe protest çaraların qayber mäşhür keşelärneñ yaqlawın äytep, bu şäxeslärneñ ilgä birelgän matdi häm äxlaqıy zararnı tüläyäçäklären belderde.

Tähran prokurorı Ali Äl-Kasi Mäxr protestçılarnı “ğıys’yançı” dip atadı häm alarnı tiz arada xökem itü öçen prokuratura qul astında maxsus törkemnär oyıştırıluın belderde.

İsegezgä töşeräbez, İran başqalası Tahranda 13nçe sentyabr’dä “äxlaq poliśiyäse” dip ataluçı İrşad konvoyı tarafınnan başın yabu qağıydälären bozuın säbäp itep qulğa alınğan häm añın yuğaltıp yığılıp xastaxanägä salınğan Mäxsa Amini 16nçı sentyabr’dä ülde. Älege xäl ildä protest çaralarına kiterde.

Aminineñ tuğan cire Sakkız şähärendä 17nçe sentyabr’dä bulğan cenaza cıyınınnan soñ başlanğan rizasızlıq çaraları tiz arada bik küp qalağa taraldı.

İranlı qayber tanılğan sportçı häm sänğat’çelär dä üzläreneñ sośial’ mediaları aşa protestçılarğa teläktäşlek kürsätte häm iminlek saqçılarınıñ qarşılıq räweşenä reakśiyä belderde.