İzrail Baş ministrı: “Döres bulğanı – fälästinlelär belän ike däwlätle kileşü”
İzrail Baş ministrı Yair Lapid: "Fälästinlelär belän ike xalıq öçen ike däwlät nigezendä kileşüneñ täêmin itelüe İzrailneñ iminlege, iq’tisadı häm balalarınıñ kiläçäge öçen döres bulğanı”, - dide
Yair Lapid Amerika Quşma Ştatlarınıñ N’yu-York qalasında Berläşkän Millätlär Oyışmasınıñ 77nçe Ğomum şura (General’ assambleya) söyläşülärendä qatnaşuçılarğa möräcäğät itte.
Lapid ike däwlätle çişeleşne yaqlawların, läkin "ber şartnıñ" buluın belderep:
"Fälästinlelär belän ike xalıq öçen ike däwlät nigezendä kileşü İzrailneñ iminlege, İzrail iq’tisadı häm balalarıbıznıñ kiläçäge öçen döres bulğanı. Böten kirtälärgä qaramastan bügen äle haman izraillelärneñ zur küpçelege şuşı ike däwlätle çişeleş vizionın yaqlıy. Min alardan berse. Ber şartıbız bar: kiläçäktäge Fälästin däwläteneñ tınıç däwlät buluı. (Fälästinneñ) İzrailneñ mullığına häm bar buluına yanayaçaq başqa ber terror nığıtmasına äylänmäwe. Böten İzrail watandaşlarınıñ qurqınıçsızlığın härwaqıt saqlaw sälätenä iyä buluıbız”, - dip äytte.
"İzrailneñ 17 yıl êlek Ğazzädän çigenüennän birle İzrail cirlärenä 20 meñnän kübräk raketa ırğıtıluın”, - äytep uzuçı Lapid: "Bu binada bezdän Ğazzägä qarşı çikläwlärne ni öçen betermäwezne soradılar. İrtägä irtä belän monı yasarğa bez äzer. Ber şartıbız bar: balalarıbızğa raketalar atunı tuqtatığız. Qorallarığıznı taşlağız, bernindi çikläw bulmayaçaq”, - dip belderde.
Yair Lapid ayıruça Fälästin İslami qarşılıq xäräkäte “Hamas” kontrolendäge Ğazzä sızığında äsir totılğan ike İzrail ğaskäriyıneñ irekkä cibärelüen häm başqa ike İzraille ğaskärineñ mäyıtläreneñ qaytarıluın teläde.
Fälästinlelärneñ "qoralların taşlawların” teläwçe İzrail Baş ministrı ul çaqta tınıçlıq bulaçağın alğa sörep:
"Häm Ğazzädä häm Yordannıñ könbatış üzänlegendä bez sezneñ kiläçäkne bergä tözi alabız. Qorallarığıznı taşlağız häm sez tözergä telägän Fälästin däwläten “Hamas”nıñ häm “İslami Cihad”nıñ üz qulına almayacağın isbatlağız. Qorallarığıznı taşlağız, ul çaqta tınıçlıq bulaçaq”, - dip bäyäläw yasadı.